周麗淇、陳嘉容和LisaS.昨日在灣仔君悅為西武行騷。周麗淇打頭陣兼壓軸出場，但被同場波濤洶湧的比堅尼洋模搶去不少風頭，謝幕時更兩度行錯位，要吳彥祖女友LisaS.通水叫「呢邊，呢邊！」周麗淇惟以笑遮醜。
完騷後，周麗淇直認沒有做足綵排，她說：「我淨係綵排咗兩套行天橋嘅衫，冇做謝幕綵排，所以唔知行邊，真係幾搞笑，有啲失禮，唔好意思。」
周麗淇又透露大會贊助其新碟，她興奮地說：「西武全包我拍MV、唱片封套、相集嘅所有衫，任我拎，所以今日行天橋嘅酬金，我都冇乜計較。」
尷尬頭耷耷
會場僅以臨時架起的黑布帳做更衣室，周麗淇表示不怕被昅，反而因為自己怕尷尬，全程在後台頭耷耷，她說：「冇昅嘢，我全程垂低頭，唔敢亂望，咁多比堅尼小姐，又有男仔，好尷尬呀。」
採訪：駱華齡 攝影：陳志嵐
