昨日大市衝破萬六點，即刻有幾隻股票出嚟抽水集資，其中包括近期經紀黃的愛股海灣控股（416）。
海灣在公布完靚仔業績，股價創出3.20元的上市新高後，即刻在噚日收市後由大股東配售舊股，套現億幾銀。
但經紀黃就話冇有怕，佢話晨訊（2000）早排一樣係大股東減持舊股，三扒兩撥就被芬佬接晒，股價至今依然硬淨，今次海灣大股東只係要億零銀，應該冇問題。
另外，麗豐控股（1125）同豐德麗（571）昨日出現驚險場面，觸發點係兩間公司宣布麗豐退出豐德麗喺澳門的住宅發展項目，原因係未獲政府批准。不過，經紀黃話大家反應過敏，呢一個住宅項目只佔豐德麗成個澳門project一小部份，整體的綜合發展計劃未有變，並可望在短期內落實。
豐德麗昨日低見6.35元，彈番上6.75元收市，仍跌4.26％。至於麗豐則最低見0.475元，收0.495元，一樣跌4.8％。
慕容小初