未選先贏，邊個咁巴閉？當然係煲呔。既然知道自己坐定粒六，煲呔梗係要未雨綢繆，從速組個同自己啱晒key嘅班底啦。
組班第一個要諗嘅位，應該係政務司司長喇啩。肥龍聽晒老婆話，申明會做埋呢屆就算，逆女人旨意，好大件事㗎喎，所以肥龍都真係唔撈居多，佢老友夏主席就估佢以退為進，遲吓就知邊個講大話。
雖然外界有貼，阿瑟王李國章都可能係黑馬，但眾所周知，阿瑟王一點頭，其他人就走夾唔抖，煲呔無理由為佢而放棄成個森林啩。唐唐呢，腳頭好，工作都算不過不失，只係多嘴咗啲，最輸蝕唔係AO出身，咁又點坐得喺呢個協調政府各部門嘅高職呢？
煲呔好想傳位畀鬍鬚曾，但係有人就嫌佢太green，未夠班喎。
有高人點醒八方，叫大家唔好睇漏眼，喺眾問責高官後，𠵱家要數有能力、壓得住場又係AO出身嘅，有位阿D姐俞宗怡，煲呔今次調佢做公務員事務局局長，正係畀足機會佢阿姐熱身。
政務司司長由女性出任梗係冇問題，陳四萬就得到肥彭信任，仲做得好開心。不過，如果要爭做，D姐未必肯，因為佢始終對政治任命抱有戒心，所以仲係保留公僕身份做高官，留自己一條後路。
爆料熱線：29290000、27860099
報料傳真：26239278
報料電郵：[email protected]