有時買樓冇代理幫手真係唔成事，好似上個禮拜荔枝角美孚新邨一宗千呎單位成交，如果唔係中原七期分行經理Anita同營業員阿Ann孤注一擲，北上江門送定，呢單買賣好大機會做唔成。
Anita透露，有個客睇中美孚七期萬事達廣場11號高層1264呎單位，雖然好鍾意，但係最多只肯畀360萬，同業主底價370萬元有10萬蚊距離，雙方點都唔肯讓步，加上業主成日唔喺香港，Anita擔心再拖落去個盤會俾其他客買咗，於是冒住被拒風險，親自北上江門送定，希望可以用誠意打動業主。
喺上個禮拜四下晝兩點幾，Anita去到羅湖再轉車上江門，到達當地已經6點，即時搵業主傾咗個幾鐘，好彩終於心軟肯減價。Anita即時聯絡喺香港嘅買家，最終拉鋸到366.8萬成交，呎價大約2900蚊。搞晒所有手續，已經係夜晚8點，Anita趕到車站搭尾班車去羅湖，凌晨時分返到香港，至醒起全日未食過嘢──搵錢果然好艱難！