星期六電腦男行開深水埗探老友，見到黃金同高登擠得水洩不通，人頭湧湧，咁多年嚟都係咁多人鍾意掃場買配件，砌機舖頭喺幾惡劣環境底下，依舊能夠生存，呢啲係咪港人拼搏精神？電腦男唔知，不過掉轉頭諗吓，咁多人不斷砌新機，咁舊咗嘅電腦點算？𠵱家電腦咁平，恐怕唔能夠學10年前咁轉贈畀人，相信絕大部份都係棄置。所以電腦男幾支持香港電腦商會喺今年舉辦嘅回收計劃，主辦單位會將回收番嚟嘅電腦分拆、重組而成一部會郁會走嘅「新」電腦，再以極低價賣番出去，相當之有環保意義，值得大家支持！
不過有意義還有意義，好多人會忽略遺留電腦內嘅資料處理，以為剷咗個Windows就一了百了，查實仍有好多方法還原，若他日俾人攞到入面嘅資料，好似網上銀行戶口、各式登入密碼，咁就真係大件事！最簡單方法，起碼喺畀部電腦人之前，用Dos或Windows開機碟，LowLevelFormat一次。咩話？唔曉？咁再簡單啲，買隻Norton新出嘅《SystemWork06》，就可徹底將個人資料隱沒起嚟。大家千祈唔好懶呀！
4月3日 心情：平伏