為咗吸引消費者幫襯，商場大業主搞嘅宣傳推廣活動愈嚟愈多，仲要不時為商場做吓翻新、提升設施同加入新服務，等顧客有新鮮感同覺得方便。
信和嘅旗艦商場屯門市廣場，配合商場擴建工程，會再花多3000萬提升設施，其中一項係增加女洗手間廁格25%，縮短輪候時間；又會增設育嬰室同專畀小朋友用嘅洗手間設備，工程將會喺復活節後展開，7月底完成。
同時，商場停車場繼3月開始，可以全面使用八達通外，𠵱家亦接受信用卡找數；而商場嘅顧客服務台，亦會增設停車場收費同八達通增值服務──愈嚟愈一條龍服務。
搞咁多嘢無非都係想增加營業額，信和集團屯門市廣場首席總經理陳欽玲話，上個月屯門市廣場營業額達3億，比舊年同期增長一成；而今個月有復活節，預料都可以比舊年同期多一成。
講開復活節，信和話商場會用糖果攻勢，冧盡啲小朋友歡心。
另外，好積極搞宣傳嘅新地觀塘apm商場，就會用復活兔做主打，計劃請過百國際同本地設計師，喺場內展示500幾隻人型潮兔，吸引年輕一族。