港股幾經努力，終於上破16000大關，恒指大升258點，高收16063，但大市成交只得317億元，同大升之勢唔係幾配合，算係美中不足。
大市走勢出現突破，好友贏了漂亮一仗，但後市仍不宜一面倒睇好，估計短期嘅上升目標唔算太高，16500已差不多，而且升途亦會幾反覆，譬如去到16200至16300水平，唔排除會有小小調整，甚至落番16000，然後再起過。
中資股繼續有追捧，H指高收6826，大升123點，又創出97年以來新高。中國糧油（506）在4.50元水平整固完成，終於突破複式頭肩底形態阻力，高收4.65元，升3.9%，以量度升幅計，短期上升目標係5.40元。3月下旬推介中糧，當時股價4.25元，理由係基金同中資對中糧將進行的重組都寄予厚望，只要一落實，股價就會有突破表現，中資嘅目標價仲係10元過外。
未來盈利料有高增長
內地地產股繼續有追捧，噚日就由二線股擔大旗，沿海家園（1124）收0.94元，升13.2%，百仕達（1168）3.025元，升5.2%，上海置業（1207）1.90元，升4.4%。中新集團（563）最高1.12元，收1.09元，升1.8%，消息話短期有料到，股價會見1.30元，然後做工夫。
中國無線（2369）在宣布業績前（4月12日）發力，衝上1.95元高收，大升0.14元，升幅7.7%，成交亦大增到近2000萬股。中國無線今次衝破下降軌，且有大成交配合，升浪確認，照度上去，短期上升目標係2.30元，中線2.80元。
中國無線主要係生產智能手機，最煞食嘅係在未來3G市場將有好大商機，家吓公司業績已經唔錯，由於接到中國聯通嘅巨額定單，未來盈利仲會出現高增長。
下禮拜三宣布嘅05年度（12月年結）業績，估計營業額4億元，盈利可達7500萬元，每股盈利0.20元。06年，單係聯通張柯打已有8.8億元人民幣，已等於05年營業額兩倍，保守估計盈利可上升到1.6億元，每股盈利35.5仙（因過去半年兩度發行合共8000萬股新股攤薄），即使以中線目標2.80元計，PE亦只係8倍。
郭兆誠