呢輪啲「珠」好熱，華華出去做嘢都經常聽到啲人講乜嘢「大珠」、「泛珠」呀咁？噚日就有個第二屆大珠三角商務委員會首次開會，肥龍許仕仁同埋王永平兩個都有嚟，講吓政府究竟做緊乜，主席馮國經會後話，公布咗個5+2工作大計啦。乜嘢係5+2？咪就係組成五個工作小組，同埋訂出兩個專題研究項目囉，其他嘢就冇乜深入研究，淨係話想條港珠澳大橋早日落成，咁就安樂晒喇喎！
條橋未傾到咁深入
之不過，佢又話條橋仲有好多技術同融資問題，所以可唔可以準時動工，都仲係得個望字，至於融資有乜問題，係咪同合和有關？佢笑笑口，再耍一招「未傾到咁深入」嚟化解。佢耍完一輪太極，華華都係唔知呢隻「珠」做咗啲乜嘢具體嘢出嚟！
有傳媒問馮國經，坊間「大珠」、「泛珠」咁多名目，可唔可以統一啲呢？佢就笑笑口話，粵港合作最緊要就係大珠，但又有好多屬於泛珠嘅城市，同香港都好緊密，講來講去，咪同冇答過一樣囉！
呢樣唔答冇所謂，但一講到會唔會爭取做選委，同埋係咪繼續支持曾特首，佢就好明確咁話「一定」！
李華華
讀者如有任何意見或報料，歡迎發送電郵至
[email protected]。