特區政府鬧人才荒，連七十幾歲嘅詹伯樂同學佛嘅林煥光都搵番出嚟幫手，八方數吓手指，好似仲有啲前朝叻人未復出。冇錯，就係當年敢頂撞京官陳佐洱，以及阻撓小小超數碼港上馬嘅皇仁舊生鄺其志。
所謂日頭唔好講人，早兩日八方去觀塘apm飲茶，見到個好熟面口嘅仁兄喺度等位，望真吓竟然係鄺神童，於是多口問佢幾時重返政府，佢笑話冇人搵佢。
咁就奇，鄺神童係肥龍皇仁師弟，係煲呔前愛將，就算政府冇位，半官方或者公營部門都大把位啦。
不過，八方有八方講，鄺神童就似乎好滿意目前嘅工作。佢離開港交所，去過新昌幫葉謀遵，後嚟轉咗去偉新做毛衣針織，兩度都係做董事總經理。連毛衣都識做，真係服咗你囉。
爆料熱線：29290000、27860099
報料傳真：26239278
報料電郵：[email protected]