煲呔立咗戰書，要同立法會鬥慳電，立法會點可以唔積極備戰。噚日立法會行政管理委員會就傾過慳電嘅問題，可惜無乜慳電奇招喎，尤其每日用成二百蚊電費，成年即係要七萬幾蚊嘅立法會外牆照明系統，喺夜晚依然會繼續開住。
主席范太解釋，覺得立法會都要保留旅遊特色，吸引遊客同埋市民，所以無改現行政策，但立法會依然會積極慳電，例如會更改部份電燈設計，以便可以用到慳電膽；又例如會再發通告，提醒議員離開辦公室或者議員工作室時，記住記住要熄燈呀。
范太仲話，有諗過整啲自動熄燈系統，但安裝費都要成十幾萬，計落唔太化算，所以先打消呢個念頭。
原來立法會大樓，連同位於花旗銀行大廈嘅議員辦事處，上年度電費超過二百萬，但同前一個年度對比，已經減少約百分之二啦，都證明立法會喺慳電方面都唔係無做工夫嘅，但如果要贏以煲呔為首嘅特區政府，就一定要加大力度先得。
爆料熱線：29290000、27860099
報料傳真：26239278
報料電郵：[email protected]