昨日講到空氣污染影響人，亦影響賽馬，披圖梁對空氣污染之害，研究甚深，知之甚詳，但相信香港冇乜人研究污染空氣如何傷害純種馬。
無論點樣，我哋要求香港上空，能見藍天白雲，並不過份，對珠三角污穢空氣之不斷飄來香港，我哋無能為力，但對香港本土製造嘅空氣排放物，可以用經濟方法解決，就係在兩電利潤管制計劃中，兩電凡用於再生能源、天然氣發電、減少硫排放量嘅固定資產，准許回報率可以維持在13.5%-15%，而所有用煤發電嘅資產，准許回報率削減到5-7%。咁嘅招數，幾年內一定見效。環保與潔淨空氣係有代價嘅，左丁山情願畀多啲電費，換番更多乾淨嘅空氣，長期嚟講，私人與社會可因此慳番更多醫藥醫療費用。如果你話：我既要潔淨空氣，又要低廉電費，更唔想有呼吸系統毛病，請你搵一個理想國。披圖梁話退休移民去海南島最好，空氣夠晒清新，但嗰度冇馬跑，對左丁山冇吸引力。
一位老友話，不如去瑞典、挪威呢啲北歐國家啦，佢哋主動使用再生能源，不遺餘力，北歐環境好乾淨，但稅率高得驚人，我哋交慣低稅率，去到好難頂；移民澳紐加拿大啦，去斷背之鄉懷俄明州都唔錯喎，幾十哩路之內先至搵到一兩個人，空氣一定好；澳紐加美一樣有稅率問題，總冇香港咁方便。左揀右揀，都係想喺香港終老，住咗咁耐，要俾人趕先至肯離開香港。既然咁鍾意香港，但唔鍾意香港啲空氣，怎麼辦？左丁山情願用最快嘅方法，就係用錢買：（一）政府津貼所有公共交通工具安裝石油氣，但唔津貼日常運作；（二）大幅度降低超級無鉛汽油稅，大幅度增加柴油稅，（三）提高天然氣發電回報率，降低煤發電回報率，（四）降低臨海地皮嘅地積比率，消除屏風式建築物令空氣自海上流入市區，以上幾點，信手拈來，以後諗多啲，寫多啲。