唔少人驚個市會有回吐，就喺呢個時候，恒指一舉而破萬六，進賬258點。期指更厲害，升夠324點，變成高水72點。
最重磅嘅滙控（005）同中移動（941），貢獻恒指120點，佔大市升幅近1半。成份股升得最猛嘅係恒隆地產（101），收15.50元，升幅5.1%。市場錢多，搵嘢炒，倒落邊類股或邊隻股，就邊類股升。不妨先搵啲落後股，然後向佢哋嘅C輪埋手。
中石化C輪2206：中石化（386）上周五派成績表，多賺14%，喺石化生意欠佳情況下，盤數都可以收貨，低見4.425元後，彈番上4.60元收市，升0.10元。市場錢多，始終會揀呢類重磅股埋手，單日成交金額已達7.41億元。買中石化C輪，有着數。
都係嗰句，低溢價者要優先考慮，例如2206。隻輪6月尾夠鐘，輪價51仙，溢價0.8%，槓桿率9倍（有效7.1倍），引伸波幅28.4%。呢隻屬於熱門貨，買賣易。
和黃C輪9880：和黃（013）近排好弱，昨日彈番0.55元，收71.70元，估計因為落後，仲會好多一陣。
搵和黃C輪短炒，吼9880。隻輪6月中到期，輪價20.1仙，溢價3.9%，槓桿率35.7倍（有效20.6倍），引伸波幅20.3%。計埋正股股息因素，隻輪溢價唔算低，炒作宜短不宜長，做嘢要快手快腳。
章盛