今日，孫柏文想用隻金手指，去篤爆一個我已經唔可以再忍受嘅謬論。這個令我想死嘅謬論，就係伯南克會落實「通脹目標設定」（InflationTargeting）嚟主宰花旗國貨幣政策。「通脹目標設定」嘅貨幣政策，其實很簡單，就係如果通脹率高過預設某水平，就機械式咁加息去壓制經濟活動。又或者如果通脹率低過某水平，就機械式咁減息去振興經濟活動。新西蘭為例，就將最高可接受通脹率，定喺2%，最低嘅可接受通脹率，定喺0%。
不過，呢個係謬論，所以今日孫柏文想一圓我曾幾何時想為人師表嘅「理想」，誤人子弟及大家。
各位同學，跟我讀一次：「Therewillbenoinflationtargeting。」好，好，再讀一次：「Therewillbenoinflationtargeting。」Good，Good。希望各位，跟我讀完頭先嗰一句，都會信花旗國唔會落實「通脹目標設定」。
啤酒與豬肉價格變化
其實，花旗國唔落實「通脹目標設定」嘅理由都好簡單。好多人話，如果有一個通脹率作為目標，貨幣政策就可以好「客觀」。如果貨幣政策好客觀嘅話，嗰隻貨幣嘅購買力會得到最高保障。即係話，愈少人為因素干預，愈「機械化」嘅貨幣政策，隻貨幣嘅公信力就愈強。不過，大家有冇諗過，決定通脹率嘅計算過程，其實係非常主觀。例如，如果酒吧賣啤酒價錢升30%，不過，豬肉價錢跌20%。一個酗酒嘅素食者，同埋一個食好多叉燒包不過又唔飲酒嘅人，手上持有貨幣購買力嘅變化就好唔同，即係話，面對嘅通脹率亦都唔同。而計算通脹率嘅官員，就可以決定呢兩個人面對嘅「平均」通脹率喇。
如果伯南克落實「通脹目標設定」嚟主宰花旗國貨幣政策。即係變相將貨幣政策嘅決策權，交畀設定計算通脹率嘅官員。在大多數國家，設定計算通脹率嘅官係一個唔起眼嘅中級公務員，試問，你知道香港計算通脹率嘅官員係邊個？你又知唔知花旗國計算通脹率嘅官員係邊個？
所以，如果當今世上，所有教育市民嘅人，例如老師、分析員、大學教授、財經口水佬等等，都好似我咁迫大家讀一次Therewillbenoinflationtargeting。咁世界就會少啲令我難受嘅謬論，我隻金手指都唔會咁倦。
孫柏文