鄧麗欣（Stephy）有一個寂寞童年，因為哥哥姊姊都比她年長十年以上，沒有玩伴的她，只好一人分飾多角，扮完香港小姐攞獎再扮老師派簿自娛。
鄧麗欣是家中孻女，有一兄一姊，二人均比她年長十年以上，由於Stephy小時候沒有玩伴，自然倍感寂寞，更不自覺地在哥哥和姊姊面前扮大人。
迷路搞喊家姐
Stephy日前說：「我細個好靜，唔講嘢，到讀中學先開始活潑，家姐同阿哥大我好多，都有玩嘅，但唔會玩打交，因為唔夠佢哋打，我覺得自己太細個，所以成日扮大人，成日都想快啲大個。」
由於沒有玩伴，Stephy就一人分飾數角，跟自己玩遊戲，她說：「我係『暗啞底』活潑，自己喺屋企最細，成日啲嘢都收收埋埋，到大個至識真情流露，所以細個鍾意扮大個，有時會一個人分飾幾角，扮爹哋、媽咪，扮老師、扮同學，派簿嗌名，扮香港小姐就一定玩啦。」
回想起難忘經歷，Stephy表示有次迷路，卻令她感受到姊妹情深的滋味，她說：「嗰陣我得兩歲幾，有次家姐帶我落街，點知行行吓失散咗，嗰時屋企人講過話蕩失路要企定定唔好郁，我咪一路企喺樓梯角等囉。過咗兩個幾鐘，家姐至搵到我，佢一見到我就喊，後尾佢仲話我當時係戇居居咁企咗喺度。」
跨欄慘跌損手
踏入中學後，Stephy的活躍本性徹底流露出來，她說：「我由細到大都係運動健將，好似玩田徑、打波咁，中學開始打排球，試過有次跑步踩到玻璃樽，跌親啦，撻落石屎地，兩個膝頭爛晒，但玻璃樽冇爛喎；又試過有次參加陸運會跨欄，本來我贏㗎，但臨到衝刺前跌低，喊啦，隻手損晒，仲好瘀㖭呀。」
採訪：朱倬誼
部份圖片提供：鄧麗欣
