將iPod駁膽機，AV場內都時有所聞的癲佬行徑，把最潮數碼音樂搭上最Classic發燒音響，不過聽則多矣，實玩情況？好多人如筆者一樣未見過；iPod同膽機嘅玩家完全係兩類人，簡直有你冇我，特意買部膽機返嚟試？成本會唔會大咗啲？AV場今個星期新返一部iPod專用喇叭，睇賣相已成部加大碼iPod咁，重喪玩2.1喇叭加隻「膽」！
記者：朱崇德 攝影：林栢鈞 ImageGirl：Heidi
iPod專用型喇叭組合市面都出過唔少，但令人有深刻印象的有官方的iPodHi-Fi，聲則好矣！不過太大嚿、設計又太硬，真係失咗原有風格；呢部SONICGEAR設計的i-Steroid1，眼部稍一接觸，全白色機身已感到佢同iPod系列可謂襯到絕，據知佢仲有一部紅、黑色機身的U2版，不過暫時未返貨，iPodU2玩家值得等吓。
肥版iPod變機箱
玩開iPod都記得新加坡SONICGEAR出過唔少專用喇叭，今次呢部行膽的i-Steroid1，第一賣點係小巧Sub-Woofer，外形設計到成部大碼版iPod咁，憑外觀攞滿分，而且高密度夾板全木質音箱，再加鋼琴面噴漆外殼，極富質感，同高貴的iPod可謂襯到絕！最鬼馬係佢機頂擺放真空二極管位置，使用中空設計，一方面可以方便散熱，仲有3盞白光LED燈，晚黑開機恍如iPod的無字Display，真係型到震；由於i-Steroid1還有擴音功能，機身的圓形按鍵就好順理成章地變為調校音量及Bass的按鍵，不過更令人愛不釋手係可愛遙控，明顯偷師自iPodshuffle，每按一下，Sub-Woofer相對應的按鍵又會着燈，簡直有如家居陳設一樣。
音效柔和有膽風味
講到音質，起初筆者都懷疑加了「膽」是否噱頭嘢！所以特別搵嚟旺角AV場玩膽機出晒名、AUDIO-VISION嘅Director陳明大作測試；首試感覺簡直有如普通電腦喇叭，不過此機一如「膽機」特性，煲上45分鐘味道就開始出嚟，而數碼音樂最大弊病，係因高壓縮檔案而造成音效失真及聲尾粗糙，但經i-Steroid1作擴音輸出的數碼音樂，音質上明顯有「柔和」的優化功效，當中以播放一些柔和樂曲最能聽出明顯分野，因為膽機的最大特性是能令音效有輕微Delay感覺，i-Steroid1亦明顯能做到。不過要留意係一般iPod只有Line-Out作輸入，所以部iPod唔好校得太大聲（校到一半音量最正），否則會有「坼聲」情況。
售賣點：華仁會（23980280）
地址：旺角花園街75-77號花園商業大廈3樓
測試講評：聽慢歌最好聲！
「聽POP嘢音效唔見得有增益，明顯唔係呢部機嗰杯茶；但聽一啲慢歌抒情歌，真係幾有膽機嘅柔和風味！最緊要佢使用簡單方便，個樣又討好可愛，千零蚊絕對值有餘！」
鏡頭背後：
老實講，記者對膽機認識可謂0！不過係咪順耳好聽都叫分得出；上AUDIO-VISION時，碰巧兩個膽機發燒友上嚟睇機，看見佢哋對i-Steroid1都非常感興趣，老實嗰句，同「真」膽機就完全冇得揮，不過聽落順耳好聲，出諸發燒友口中，千零蚊貨仔，都實屬不易！
