賭王何鴻燊三姨太陳婉珍近年變得高調，昨日還榮升東華總理，做慣主禮嘉賓的賭王，乖乖在家屬席坐足一小時撐場，又三度吻賀三姨太，作出「任攞善款」承諾，更自稱東華姑爺，𠱁得三姨太笑逐顏開。
何鴻燊四姨太梁安琪去年做保良局總理兼澳門立法會議員，風頭一時無兩。而一向低調的三姨太陳婉珍，近期亦發功，愈見高調搶鏡。
昨日陳婉珍榮升東華三院總理，全黑套裝出席在上環舉行的就職典禮，老公何鴻燊亦到場觀禮，乖乖坐足一小時，之後三度吻賀嬌妻。
「唔會扣家用」
賭王滔滔不絕說：「多啲幫助人係好事，梗係支持啦，我伯爺何世光都做過東華主席，Angela（梁安琪）又做保良局（總理）。我就最開心，我係東華姑爺，又係保良姑爺，冇乜幾多個人可以咁㗎。」
提到捐款，賭王表示會拍心口捐錢支持，他說：「佢問我攞幾多，我咪畀幾多，絕對唔會扣家用。」
區海倫闔家歡
三姨太陳婉珍則透露因仔女長大，空閒時間多，才投身慈善事業，更會專注東華醫療事宜。問陳婉珍可怕被指與四姨太梁安琪競爭？她得體地說：「我哋兩個之間冇比較，係你哋傳媒講啫，不過我都唔驚傳媒，我覺得你哋好友善。」
此外，新任東華總理還包括傅明憲、區海倫丈夫陳仲尼等。傅明憲老公葉劍波捧場，但拒絕吻賀太太，而區海倫全程以攝錄機拍攝丈夫就職儀式，兩個兒子興奮得大叫，非常溫馨。
採訪、攝影：RitaLeung
