噚日嘅立法會火花都唔少，除咗領匯問題，討論證監會監管上市公司嘅問題時，亦激起火花。事緣04年底，賭王何鴻燊就會否將賭業注入新濠發表前後不一嘅言論，年多之後好似不了了之咁；另外今年初盈科保險發生賬目出錯、誇大盈利事件，到家陣都未見證監有任何行動，議員話應該要有機制，監察證監唔跟進某啲個案係咪有理據。
出席會議嘅證監會法規執行部執行董事李顯能就話，𠵱家有程序覆檢委員會覆檢證監嘅調查個案。不過石禮謙回應，如果證監拒絕履行職權，委員會都未必睇到，李顯能駁回話唔覺有呢啲情況，亦唔知究竟係咪有停止調查嘅case交由委員會覆檢，激到石議員彈起。李顯能亦唔好老脾，當面問佢「究意你講完未」，氣氛好似差啲要講手，好彩主持會議嘅陳智思調停，否則可能出現六國大封相。