煲呔要連任，日日掛住拉票曝光，做啲有益有建設性嘅大事，啲唔等使嘅交際應酬就派晒肥龍去。噚日一大清早，肥龍就跑咗入大嶼山香港亞洲國際博覽館，參加佢自己辦公室屬下效率促進組主辦嘅一個有關優質公共服務國際研討會。
肥龍梗係賣花讚花香，話政府服務頂呱呱，而且仲成功控制公共開支，提早滅赤㖭。
上晝個論壇鬼咁嚴肅，但係到咗夜晚，肥龍搖身一變，成為香港國際電影節三十周年晚宴嘅主禮嘉賓，同啲龍虎武師同武術指導攬頭攬頸。噚晚個主題叫做「向動作指導致敬」，唔怪得啲人嚟自五湖四海，五位獲獎嘉賓香港人都耳熟能詳，個個都係師傅級人馬，有劉家良、袁和平、洪金寶、成龍同程小東。
肥龍出名係音樂同電影發燒友，佢喺致辭時就笑自己讀書時已經寫吓影評，從事同電影有關嘅活動，佢又大讚動作片係香港電影一個獨特品牌，令香港喺世界電影市場上揚名立萬喎。香港武打片的確好威，人人都知我哋出咗個李小龍，但肥龍連七三年套「天下第一拳」成為當年全美賣座冠軍都記得，真好記性。
爆料熱線：29290000、27860099
報料傳真：26239278
報料電郵：[email protected]