相信唔少人都記得十幾年前嘅「大時代」，當時嘅經濟環境同𠵱家完全係兩回事，香港人冇乜真正嘅憂患，亦冇乜真正嘅開心。可能當時嘅人實在太忙，打算移民嘅趕往搵錢，唔打算移民嘅有唔少都因為香港人才真空而極速上位，亦都冇時間去傷春悲秋。
睇番當年唔少人會話︰「唉！嗰陣時香港乜都掂，𠵱家就乜都唔掂……」如果當年閣下係打工仔，人人都搵工跳槽，人工又係咁加，諗落又真係一個幾理想嘅世界。
92年恒指由4300點升到5500點，點知93年就已經升到11800點，如果閣下既係股民又係打工仔，當年嘅情緒就一定更加亢奮。當年有唔少朋友發咗筆小橫財，跟手就置業安居，再賺多啲就細屋搬大屋。又有人響地產賺咗錢就炒股，結果股票又升……如此周而復始，呢的咪叫做泡沬囉！
點解無端端諗起九十年代嘅事？因為秋官囉！佢套新電視劇上，股民奔走相告。利世民見股市有風險，就不如及早埋單計數，見冇事做就攞秋官代表作之一《大時代》舊夢重溫，恍如隔世。
大時代︰股票必勝法
套戲令人印象最深刻係「股票必勝法」︰「股市原意，乃讓集資搜資有其地，社會向榮，人皆有賺。惜人性貪婪，耗盡心思，巧取豪奪，樂土成煉獄，血雨腥風，殺戮不息，無數人蕩產傾家輸性命，勝者則喪良知人格。余於股壇數十載，未嘗見一真正鸁者，智者應知此乃一處永無贏家之戰。取勝唯一法︰『及早離去』四字而矣。」
初時利世民認為如果編劇識炒股，就唔使做編劇啦！雖然話套電視劇跟手就有「秋官效應」，不過最終都係股樓齊飛，大家當然冇再諗究竟咁嘅升市合唔合理，總之都係今朝有酒今朝醉。之後嘅事就已經係歷史，不贅。利世民唔係話啲編劇有料到，只不過係當時大家都畀眼前泡沫迷惑，所以亦時刻警惕自己要小心。
最後都係嗰句，與其擔心秋官效應，倒不如從歷史學習，溫故知新。
利世民