自從成為「政治家」之後，煲呔果然講嘢都有啲進步，好似噚日佢講自己退休之後嘅安排，係打算離開香港去第二度住三幾年，費事對下手「多多事幹、阻手阻腳」咁話。呢啲咁通情達理嘅做法，秉承咗英國文官嘅傳統，直情超越晒祖國領導人鄧小平嘅水平㖭。
據接近煲呔嘅人士話，煲呔有呢種諗法已經好耐，有十幾年咁耐；佢見夏鼎基做咗布政司之後靜靜返祖家，對香港事務不再多講一句，真係好感動。咁又係嘅，去年老董腳痛落台，雖然冇再做特首，但就做咗政協副主席。須知政協副主席份屬國家領導人，非常之尊貴，無論在北京定喺特區，都有好多人逢迎巴結，咁樣搶晒人哋啲風頭就唔好啦。嗱，好似前兩晚咁，董生又一家大細仲帶埋六個孫去大會堂聽音樂，董太着到隻雀咁靚，又搶晒啲記者嘅鏡頭，真係幾阻手阻腳。
想當年鄧小平退咗做一個普通黨員，本來應該返屋企湊孫，點知佢就去南巡，啲總書記、總理幾難做呢。嗱嗰個陳太呢，就好學唔學學埋鄧小平咁「多多事幹」，自己退咗位仲「見步行步」，又話煲呔應該向北京反映香港人對民主嘅訴求，佢都唔知呢啲嘢正正係人家嘅死穴，話就話飲香港水流香港血，實際係點，大家心照啦。所以陳太如果識大體，應該離開一段時間，去英國又好、去美國又好、返祖國亦唔拘。你話如果阿太肯走，煲呔出埋頭等機票都制呢。
唔做官應該去第二度住，咪多多事幹，係啱嘅。但煲呔咁講，除咗董生、陳太
返九江種樹飲雙蒸
究竟他日煲呔退休唔做特首，佢會去邊處住幾年呢？咁就要睇吓棵樹啦。咩樹？咪佢阿爸當年在鄉下九江帶來港棵高桑樹。呢棵樹，由壽山村道財政司司長官邸，搬上山頂白加道政務司司長大宅，現時就移種於禮賓府花園，一直跟住煲呔。棵樹現時五呎高，一年或者六年之後將會更高，你話種去邊好？當然係種番去九江最好，咁煲呔可以安心返九江住番三幾年，日日種樹飲雙蒸。
爆料熱線：29290000、27860099
報料傳真：26239278
報料電郵：[email protected]