一年一度嘅大專辯論賽決賽噚日喺維園舉行，但個辯題「香港應全面推行五天工作制」冇乜爭議，只係技術上拗應唔應該「全面推行」，唔及上年辯論「人大釋法有助落實一國兩制」咁精采，正反雙方啲理據都係咁上下，冇乜特別驚喜，最後由反對全面五天工作嘅嶺南，三比二贏咗支持全面五天工作嘅浸大。評判之一、平機會主席鄧爾邦上台講嘢時，個咪突然傳來一聲爆炸巨響，原來佢講爆咗個咪，結果要大會幫佢換咪。
跟住佢上台嘅范鴻齡窒阿邦哥話：「好犀利，咪都爆埋！」但估唔到佢講講吓，唔知係咪講錯嘢，呢支新咪又講爆咗，其實五天工作冇乜爭議，佢哋又唔係台上嗌交，又冇人爆粗，竟然連續谷爆兩支咪，真係好鬼離奇。
商界觀望五天工作制
邊個贏咗場辯論都好，部份公僕今年七月就會開始行五天工作制，但除咗部份大公司，啲商界對呢樣嘢都仍在觀望。范鴻齡話，中信泰富係行五天工作，但要喺香港全面推行就有難度，香港好多中小企同服務業，如果全部五天工作，營商成本係會大大增加，而且政府都唔係全面推行啦，第一個階段都係得六萬公僕參加啫，當然長遠都係應該咁做，希望政府喺第二、三個階段會推多啲啦！
除咗范鴻齡同鄧爾邦，廣播處處長朱培慶、律師會會長羅志力、同埋高院原訟法官林文瀚都係評判。林官讚啲同學表現好，話如果𠵱家啲律師講嘢有啲同學咁好，佢審案都開心好多，希望遲啲可以喺法庭上見到啲同學，司儀就答口話班同學有機會做律師，點知林官跟住補充話唔一定係律師先至上庭，好多人都係選擇自己上庭辯護。
嘩！林官咁講，咁係咪暗示啲同學將來會惹官非？話晒生不入官門、死不入地獄，除咗律師同法官，冇乜人希望要上庭講嘢啩。
爆料熱線：29290000、27860099
報料傳真：26239278
報料電郵：[email protected]