廣播處處長朱培慶話港台內有共識要脫離政府搞公司化同公營化，不過問題係錢從何來？八方日前見到公共廣播服務檢討委員會主席吉叔黃應士，佢話都收到同樣訊息，但係就諗唔掂港台點運作，冇可能錢就照收，管就免問。
如果港台可以自負盈虧，唔使問政府要錢，呢個就梗係好唔同，但係有人計過，港台要每戶收成三百大元先至夠開支，香港人聽慣免費節目，又肯唔肯畀錢睇同聽公共廣播呢？
真係有一大堆問題要答，樣樣都同錢有關。委員會位靚秘書劉焱話，佢已經去信問港台畀條數嚟睇，但係到目前都仲未有回音。叫港台計數真係唔容易，港台中人話，劉秘書開列好多條問題要佢哋答，好似數碼化要幾多錢？搞個電視台要幾多錢？好多都未做過，梗係要時間，反正仲有幾日先到限期。
劉焱嘅問題梗係唔易答，佢阿姐當年做過陳太同煲呔嘅政務助理，因為要生仔退居二線，調去幫吉叔前係葉澍堃嘅手下，𠵱家就專責「整治」港台。吉叔笑佢係常秘人才，八方都覺得佢前程無限，喺八十年代尾九十年代初，佢係港大辯論隊主將，攞獎無數，畢業之後去做官，平步青雲。八方噚日喺港台搞嘅大專辯論賽決賽見到做評判嘅朱處長，問佢記唔記得港台呢個比賽俾劉焱出盡風頭，朱哥哥有啲惘然。世界就係咁細。
爆料熱線：29290000、27860099
報料傳真：26239278
報料電郵：[email protected]