馮仁昭上星期五晚十點幾喺灣仔有富豪飯堂之稱嘅福臨門，撞到東亞銀行主席李國寶一家三口食完飯準備離開，李國寶一馬當先，太太潘金翠就隨後，李民橋行到最尾。
熱爆名人界
佢哋一家人呢排認真唔得閒，事關近呢幾日嘅名人界熱爆話題，都應該離唔開李民橋前妻、鷹君集團太子女羅寶盈再婚嘅消息，佢同美心集團老闆伍偉國閃電結婚，個愛情故事仲複雜過啲劇集，都咪話唔精采。
不過李國寶對前新抱就認真唔話得喇，早前就大大方方咁祝福一對新人幸福，都算係為羅寶盈再婚掃除唔少障礙啦。
回復單身一族嘅李民橋，舊年都俾記者影到佢同莊氏太子女莊家蕙過從甚密，對於前妻再嫁，佢一直表現輕鬆。
李民橋前晚行出酒樓，佢同爹哋媽咪分乘兩部車離開，李民橋臨行前仲特登行近爹哋李國寶架車同佢傾咗幾句，然後就上返自己架車，由司機送去銅鑼灣方向離去，一對離婚夫婦各自各精采，都算係另類好結局啦。
