季總結。總結一下我隻金手指，為大家第一季裏面篤過出來嘅貼士。本欄，喺2月17日第一次同大家見面，當時，隻金手指仲係每個禮拜五為大家篤、篤、篤。後來，去到3月，得到《蘋果日報》嘅關照，我就有機會日日呃稿費。好在《金手指》呢欄收視率偏低，如果被有關人士見到我咁誠實，肯定捉孫柏文同埋隻金手指去問話。
為慶祝《金手指》可以幫我日日呃稿費，我就喺3月6日，為大家篤出貼士，叫大家買白銀，目標價為120美元一盎斯，而目標價有效年期10年。當時，白銀現價為10美元一盎斯，點知一貼白銀，佢就即刻跌穿10美元。不過，到上個禮拜五，白銀現價為11.54美元一盎斯，升咗15.4%。如果大家有買，都有錢賺。雖然，孫柏文係白銀大好友，不過，上個禮拜白銀嘅升勢速度，連我都覺得太急。不過冇所謂啦，橫掂仲離開目標價咁遠，乜嘢價錢買都ok啦。
諗吓，你有冇聽過人講：「如果我喺1990年，某月某日，買滙豐就好啦。」
你只會聽過人講：「如果我喺1990年，買滙豐就好啦。」所以講長線投資，隨時都係入市嘅好時機。所以，大家靜心等待，千祈唔好放住。
油價再向上挑戰
到3月21日，我隻金手指為大家篤過中國石油公司（857），叫大家買，目標價為9.8元一股，而目標價有效年期為12個月。到今日，都只不過係兩個禮拜，所以，冇乜嘢可以再講。當時，中石油股價為7.8元一股，到今日，都已經升咗3毫子，3.8%。油價一定會再挑戰，舊年花旗國打風嘅70美元一桶油。如果升穿70美元一桶，9.8一股嘅目標價，就會好快到達。
第二季，大家都想問嘅問題，同埋想知嘅答案，就係花旗國加息加完未，如果未完，又會加多幾多息？隻金手指有頭緒，但冇答案，不過，一有答案，一定會同大家講。
孫柏文