繼王家衛會做今年康城影展評審團主席後，揚名國際嘅李安亦獲邀做下屆威尼斯影展評審團主席，不過一向低調嘅李安，到𠵱家都未落實做定唔做㗎。另一方面，郭富城主演嘅《父子》因為製作問題無法參加康城影展，要轉戰威尼斯，連章子怡部《夜宴》亦因製作不及，考慮喺康城辦大型宣傳展之後再報名威尼斯競賽。