Karen：（好緊張咁）喂，謝太？Karen呀。得唔得閒傾幾句？有隻火箭股介紹畀你。今次要快手，支火箭啱啱離開發射台。
謝太：咁犀利？邊隻呀？
Karen：358江銅囉。謝太，我知你做足功課至入市。嗱，𠵱家要霸開市盤頭位得番幾分鐘，等我馬上解釋你聽。首先，佢下個禮拜出業績，全世界都話會賺六毫幾。以禮拜五收收市$6.9計，跟住如果每年賺到六毫幾，11年就可以贖回股價。佢阿媽仲話拎一半盈利派息，即係有四厘幾五厘。
佢嘅上升動力嚟自國際銅價飛升，但佢仲未反映。上個禮拜，我哋香港人先至覺悟追貨。
謝太：我都見，好勁。
股價未反映銅價飛升
Karen：謝太，話江銅未反映銅價，原因好多。第一，03到04年初，銅價第一次升浪，上咗一倍，香港人將江銅由1蚊炒到5蚊，大家覺得，祖國經濟起飛，會吸晒全世界嘅礦產資源，中央亦都冇意見。點知，到04年初，中央話要宏調，到4月就好重手咁一刀切，唔畀銀行放任何形式嘅債，大家以為中央黐咗線，而江銅股亦同時由5蚊跌到兩蚊。
可能因為坐完過山車，大家陰影大，所以，雖然舊年中到今日，銅價又升一倍，江銅硬係升唔穿$5.5元嘅04年高位，大家都等緊勇士去領軍。到兩個禮拜前，真係升穿$5.5元，上個禮拜大家就追貨。淨係呢個原因，江西銅都抵炒。
話佢未反映銅價，第二個原因係太早對沖，前兩年年初，一面拋空嗰年嘅產量，一面鎖定嗰年嘅售價，點知兩年埋單，銅價都升突，令到江銅賺唔盡。不過，佢哋今年話唔再拋空，話06年業績「聽銅市由命」喎。就算今年銅價冇升跌，江銅利潤都會升，更何況今年銅價升硬。
謝太：咁點解佢哋拋空，係唔係睇淡銅價，未靈驗咋？
Karen：Goodpoint！其實03年前，間公司冇乜人理，到03年尾，資源股開始得寵，啲投資銀行開始搵佢哋傾偈，猛話原材料漲價係泡沫，唔會持久，起勢咁叫江西銅做企業風險管理，迫住江銅拋空。
除咗銅仲生產黃金白銀
仲有，最後要買佢嘅原因係，除咗銅，佢哋仲生產好多黃金同白銀。淨係金，已經係2899紫金礦業嘅四分一。佢哋應該改名，加多兩個字，叫做「江西金銀銅」。謝太，你都知道，黃金、白銀近期走勢係點。
謝太：睇落，江西銅真係可以炒。好！幫我買。咁Karen，你會睇佢升到幾多？
Karen：最少11蚊！升到去嗰個價位，我再打電話畀你。謝太，多謝晒噃！