紙紮行業與時並進，陽間興乜陰間就興乜，早排紙紮師傅阿智狂砌紙紮iPodnano、PSP、KERORO軍曹公仔……最近忙砌乜？諗吓今年6月有乜盛事？咪係世界盃囉！原來大把體貼孝順仔女，趁住就快清明，訂製有關世界盃嘅紙紮貨品，等黃泉之下嘅親人一樣感受到世界盃氣氛，唔止燒Plasma喎，鍾意嘅話，燒個球王朗拿甸奴陪先人踢波都仲得。
記者：陸伊琳
攝影：陳陶鈞
無劉華訪問細哨補數
由於同紙紮師傅阿智有約在先，所以同日原本由我跟開嘅萬人迷劉德華adicolor訪問被迫放手，交畀其他同事跟進……唉！有幾多機會可以同劉華近距離接觸？心情好灰，前往阿智位於深水埗嘅紙紮舖途中，思路混亂：「劉華呀，劉華……我哋無緣見面喇，好慘呀……」不不不！做訪問最忌心散，要集中精神，尊重受訪者，阿智雖然唔係甚麼大明星，但其實佢係紙紮界近年冒起得最快嘅新星，有無窮創意，設計獨特兼跟得貼潮流，耍家在曉參照雜誌相照辦煮碗做番數碼相機、電玩、寵物用品等紙紮用品，不但深受年輕孝順仔女歡迎，連台灣、日本等外國傳媒都曾經訪問過佢。
阿智知道我放棄劉華訪問，好感動，掉轉頭𠱁番我開心：「無劉華，我幫你約世界足球先生做訪問。」說罷即攞出心血之作細哨紙紮公仔，我開心都彈起，或者你會話大吉利是，但我就話百無禁忌，細哨個Look幾可愛，我同攝影哥哥好似小Fans一樣：「可唔可以同細哨合照？」在場路人一見細哨笑容盡開，邊個話紙紮公仔一定恐怖㗎？
解構紙細哨
眉似、面形似、鼻似，最似當然係棚哨牙，唯一最唔似係對眼，做得太大對，不過話明係Q版，我就畀相似度90分嘞。
阿智創作嘅紙紮細哨好細緻，就連髮型都花過心思，擯晒辮仔，着嗰件仲係巴西國家隊黃金10號球衣，做到好足噃。
波衫波砵乜Q都有
做嘢做全套，入舖睇睇發覺阿智出品包羅萬有，英格蘭、日本、阿根廷等最新款波衫全部仿照今屆國家隊落場版波衫製成，像真度都幾高，至少一望就知係邊件，再睇，連碧咸對紅色波砵、世界盃專用足球、雷米金盃甚至球場都有，不過阿智就唔多滿意開幕用嘅慕尼黑球場紙製模型：「呢件作品花咗我好多時間，功夫又多，但效果自己覺得麻麻，有機會做個更似嘅球場，加埋座位、樓梯等設施……」嘩！一把火燒完就無喇，認真過龍喎，不過都睇得出佢嘅誠意。
街訪：個個又笑又讚
睇波三寶：啤酒、Plasma、解碼器
𠵱家唔興大大嚿厚身電視機，要In當然揀Plasma或LCDMon，紙紮界同一個Trend，陰間無玩懷舊呢回事，傳統電視機已Out！紙紮Plasma或LCDMon仲有14吋、21吋、29吋及34吋唔同Size選擇，就連手提電視都有，06世界盃又在有線，點少得燒埋個解碼器同睇波必備嘅啤酒呢？
阿智：「死，無嘢好驚！」
好多人包括我在內，都想八卦吓紙紮呢一行，例如點解入行？有無撞過鬼？阿智話呢類問題好多人都問過，唔爭在講多一次：「繼承祖業，同老竇組成父子兵團，老竇主攻傳統市場，我就拓展新潮市場，起初都係當手作仔玩吓砌吓，點知愈砌愈有興趣，啲客要求又愈來愈得意喎，紙紮變潮物，估唔到咁受歡迎。」臨走，我問：「有無諗過為自己設計乜嘢紙紮，等日後……唉！大吉利是……」佢話：「死，我都覺得無乜嘢好驚，我最想整間勁豪華好多Detail嘅大屋別墅連房車畀自己，可惜無位擺，所以先打消念頭。」
（a）寶華紮作（27769171）
地址：深水埗黃竹街34號地下
註：紙紮貨品須預訂，大約3日起貨，可度身訂做。
（b）俊城行（25474653）
地址：西環皇后大道西138-142號地下