【本報訊】長者平衡力不佳，一次絆倒足以致命；年輕人長時間使用電腦，患上腕管綜合症的個案也不斷上升，理工大學康復治療學系三月中開發了全球首套遙距治療器，病者只需安坐家中，即可遙距學習太極、進行平衡測試及訓練，令雙手回復活動能力，平衡力大幅提升，巿民如有需要，可借用有關設施，在家中自行訓練。 記者：張嘉雯
二○○三年，年過六十五歲的長者佔本港人口一成二，近八十萬人，每年約有三分之一長者曾有一次跌倒經驗，部份人因此要長期卧床。練習太極，能有效改善平衡力，減低跌倒風險。
理大康復治療學系系主任許雲影教授表示，過往長者要學習太極、進行平衡力或手力訓練，必須前往指定地點，新系統令長者毋須依賴家人，「有啲病人隻手用唔到力，飯碗揸唔到，電話聽唔到，做咗兩個月訓練之後，都可以重新投入工作。」
物理治療師定期監察
新系統由數部份組成，使用者只需在家用電腦上加裝一塊壓力板或手力訓練器，即可進行訓練，訓練以遊戲為主，病人需要利用平衡力擊中目標，物理治療師會定期遙距監察進度，「我哋之前做過十幾個病人，有啲人係隻手中風癱咗，有啲因為腕管綜合症，亦有好年輕嘅男病人被人斬手，啲神經斷咗，每日做二十分鐘，好有幫助。」
許雲影指出訓練所需的器材非常簡單，開發軟件約需一萬元，手部訓練器成本約為三千元，用來訓練站立或坐下時平衡力的壓力板也只是數千元，希望將成本減低，令更多人受惠，「啲老人家都可以好容易用到，用玩遊戲嘅方式佢哋又好鍾意，我哋𠵱家仲係試驗階段，病人如果有需要，都可以嚟，我哋可以借畀佢哋用。」
為長者開創「坐式太極」
新系統可以進行平衡力的精密測試，較現時醫院或治療師用肉眼評估準確得多，「𠵱家多數係物理治療師用肉眼評估，根本唔知道病人進度，但係有呢部機就好好多，可以將啲資料數據化，平衡力好咗一毫米，都可以測到出嚟。」
為了幫助更多有平衡力問題的長者，該系計劃開創一套「坐式太極」，讓無法站立的長者能享受太極的好處。查詢電話：27666734。