在《情陷夜中環2》中飾演情侶的葉璇和陳啟泰，前晚在中環街頭展開連場激吻，在事前未有做任何口腔清潔工夫及排練下，二人一埋牙便咀足十秒，並咀了四次之多，咀到鼻都歪埋。
葉璇和陳啟泰前晚九時許在中環IFC對出天橋拍攝《情陷夜中環2》外景，劇情講述二人情到濃時當街激吻，第一take已咀足十秒、咀到鼻都歪後，導演才喊停。葉璇於是放鬆並說：「吓！仲唔cut？個鼻掂晒㗎喎，夠晒感情啦！」
拍完第一take後，導演還要求他們咀多三次才肯罷休，原來並非二人NG重拍，而是導演要多角度拍攝而已。
導演不敢喊停
事後葉璇說：「呢個係戲裏面嘅訂情之吻，我第一次同陳啟泰合作，開工四、五日已經要拍咀戲，但佢好專業，每一個角度拍都係一take過，導演見我哋鬼咁有mood，都唔敢叫停！我自己都未試過拍咁多角度同錫咁多次！」
讚完陳啟泰專業還不夠，葉璇更大讚對方有魅力，是亞視型男，又指今次續集有對方助陣，定可冧盡fans捧場。
冇向老婆備案
記者問陳啟泰今次拍咀戲可有向太太備案時，陳啟泰表示沒此需要，其時在旁的葉璇即插嘴說：「吓！佢要問老婆，咁我咪要問阿媽？」問陳啟泰是否咀勻亞視所有女藝員時，他笑說：「之前淨係同陳煒拍過咀戲之嘛。」
採訪：王崇穎 攝影：陳俊強
