好想去泰國浸Spa？不過只得復活節假期，捱貴機票貴酒店諗落又唔多化算，於是你選擇到本港的Spa暫且幻想一下身在異鄉，不過，想快靚正原來還有另一個選擇──置身十足Spa環境的餐廳歎泰菜，悠閒寫意度一樣爆燈，而且所費無幾，最重要係呢度強調「SlowEat」文化，置身鬧市，原來同樣可以經濟實惠地偷得浮生半日閒。
記者：陳慧茵
攝影：伍慶泉
Model：Va,Ellen@Salvador
食Spa體驗
古語有云：「食色性也。」不過對今日的餐飲業來說，食已非單純生理需要，環顧近年成功的餐廳，你會發現感性消費根本就是當下主流，新開張的simplythai打的正是這鮮明旗幟。繼九龍灣的simplythai後，銅鑼灣新店特意起了一個中文名字──心。泰，賣點是讓你飽餐一頓後，恍如享受過一次寫意閒適的Spa旅程。裝修上大量選用暖色系，燈光刻意調得幽暗，配以舒適的音樂，離開後，似乎，對何謂食的閒適瞭解多了一點點。
走進Spa旅程
01.揀香薰
享受Spa前你會先揀選心愛香薰油，simplythai轉個方式，顧客甫踏入店面，便可揀選不同香味蠟燭，相通的是兩者都是長伴整個旅程的關鍵。（左至右）薰衣草、玫瑰花、海洋味。
02.免費特飲
揀選位置後，每位顧客可享用一杯以羅望子調配而成的免費WelcomeDrink，概念源自Spa後奉上的特飲。離開時，每枱更會得到一張寫上不同格言的「心靈雞湯」小書籤，讓你肚皮以外也滿載而歸。
03.慢慢食
這裏強調讓心情放假的飲食哲學，侍應上菜時不會一放低菜式即雞飛狗走，你亦不必急於快快完餐離開，據聞將來更會提供暖水袋，讓M到的女士抱着進餐。
04.深情貼士
如廁後有罕見的護手液讓女士們修護肌膚，注意，洗手間內貼滿「深情小貼士」，記緊細意品嚐。
泰籍師傅駐場監督
單賣氣氛Service，相信食客嚐過一次後便永不回頭，要令各位長駐捧場，食物當然不離餐廳主題──「心」。行政總廚關順發：「呢度長期有至少3位泰籍師傅駐場，加上8成原材料嚟自泰國，就係希望氣氛以外食物都係泰國正宗級數，為咗鑽研新菜式，我亦專程去泰國生活，當正自己住喺嗰度，走勻當地嘅街市，瞭解泰國人煮嘅泰國菜同香港製造嘅泰國菜究竟有咩分別。」原來，要烹調正宗泰國風味，必需對幾種常用泰國香料如香茅、辣椒等的比例用得恰當，最後以傳統的泰菜技藝加以改良創新，配以新式的Presentation，便成為simplythai的創意Menu。
a.燒焗羊架青咖喱$72
店舖招牌菜，新西蘭羊架面層灑上香草及麵包糠後燒焗，羊架鮮嫩而不嚡口，青咖喱汁墊於菠菜之下，令羊架鮮味不致被青咖喱味蓋過。
b.香芒米紙卷$54
米紙本屬越南菜式常用食材，以米紙包裹芒果、胡蘿蔔絲，面層綴以清新薄荷葉，食時蘸點以酸子特製的泰式辣醬，酸酸辣辣，的確刺激醒胃。
c.蕉葉焗雞沙嗲$46
雞串燒隨處可食，為跳出固有框框，雞串以蕉葉包裹後再進行烤焗，肉汁得以完整鎖緊，難得蕉葉味輕輕滲進沙爹醬汁之內，令雞串帶獨有蕉葉清香。
d.香茅大蝦柚子沙律$58
用上出名清甜、肉質結實的西施柚，新鮮海蝦啖啖鮮味，最特別還數那狀如豆角的邊豆，邊豆是泰國地道蔬菜，配合薄荷葉、金不換等，口味清新健康。
e.鮮胡椒炒蟹$155
正宗泰國菜着重以新鮮調味料烹調菜式，以乾身鮮胡椒炒泥蟹，胡椒既辣且麻的味道滲入蟹身中，吊引出蟹肉鮮味，比慣常吃到的咖喱炒蟹有趣得多。
f.胡桃酒香葩菲$36
以紅酒浸過夜的西梅堆砌成蘭花狀，呼應店舖Icon，芭菲入口軟滑，面層的胡桃以人手生磨，入口帶焦糖香，賣相與口感俱佳。
g.酸辣龍蝦泰薑湯$46
湯底以龍蝦、香茅、南薑、乾葱、檸檬葉等熬製而成，不惜工本在於配以矜貴的越南琵琶蝦，蝦的爽甜混合湯底的酸辣交集，給味蕾格外的刺激。
食客有Say
simplythai心。泰
電話：25061212
地址：銅鑼灣時代廣場11樓1104舖
營業時間：11:30am-10:30pm
座位：110