最後兩個被拘嘅韓農上星期都獲釋，官司暫告一段落，有法律界人士形容政府今次自己攞嚟衰。
話說舊年聖誕前夕，十二月十七日深夜、十八日朝早警方將逾千韓農拘捕，超英趕美，破晒世貿紀錄。十九日將十四個示威人士，包括一個日本人、一個台灣人、一個大陸人以及十一個韓農落案，當時班韓農同其他三人都想快快走人回家去，所以都肯認罪，承認是犯了「冇批准集會」罪。
但係警方就唔收貨，一定要告十四人「非法集會」，而其實兩條罪嘅刑罰係一樣嘅，結果韓農唔肯就範，惟有對簿公堂。即係本來十四比零，政府贏晒；最後變成零對十四，政府輸清光。
八方聽聞，班大狀本來為韓農籌錢打官司，𠵱家贏咗，可以退錢，等政府付鈔，莫非納稅人嘅錢真係要咁樣使？成個世貿部署，警隊贏到盡，傲視全球，可惜最後一晚拉人到告上法庭，可謂臨尾香，公關學要找最壞的例子，不作他選。李一哥英明一世，就係冇政治智慧，紀律部隊訓練高層決策者，他日都應該開多兩課。
爆料熱線：29290000、27860099
報料傳真：26239278
報料電郵：[email protected]