上班一族工作無定時，平日甚少早起飲早茶，凌晨時分工作完畢歎番一盅兩件自然成為長期心癮，以為選擇只有7-11或點心王？原來在西環一樣有通宵營業靚點心食。蓉苑除了傳統排骨鳳爪燒賣蝦餃外，還有大量懷舊點心：鵪鶉蛋燒賣、大包、臘腸卷、香芋鴨腳扎等供應，單是點心已接近30款。開在夜市欠奉的西環，客人品流自然沒這麼複雜，負責人林小姐：「凌晨時分幫襯嘅多數係大學生，附近店舖過咗凌晨兩點就收晒工，佢哋咪過嚟食吓點心囉，仲有呀，好多附近住嘅老人家凌晨三點幾就會起身晨運，佢哋周不時都會嚟食啲點心先去做運動，所以唔怕人流唔夠無生意㗎。」
懷舊靚大包$10
依足傳統大包做法，內藏豬肉、蝦、鵪鶉蛋、雞、紅蘿蔔、叉燒等餡料，非常飽肚。
標榜香港製造
這裏的點心師傅擁有30多年整點心經驗，所有點心均是香港製造，不似某些店舖以大陸中央工場點心頂替。除點心以外，還有各款糖水供應，林小姐：「好多明星可能工作無定時都會嚟幫襯，好似袁潔瑩都試過2、3點落嚟幫襯，食啲點心，再嗌個芒果布甸咁囉。」除西環舖外，元朗的帝皇點心茶餐廳及銅鑼灣的嘴兒甜點心均屬同一集團，同樣主打懷舊點心，最吸引還是這裏茶錢只收$2位，難怪不少街坊都喜歡在此打躉。
臘腸卷$7
從前粵式早茶必備的點心，選用香港出品的臘腸，鹹甜適中，配以柔軟包皮，有點肥膩，間中一嚐也無妨。
鵪鶉蛋燒賣$7
愈來愈少酒樓供應鵪鶉蛋燒賣，多了鵪鶉蛋，黃皮變了白皮的燒賣，吃的人都是貪圖那陣懷舊味道。
Peter：我住附近又退咗休，好似張國榮話齋：「無心睡眠腦交戰」咪落嚟幫襯囉。
蓉苑點心甜品（28557738）
地址：西環卑路乍街53號地下