三月二十九日《蘋果日報》與經濟日報分別刊登咗一個全版廣告，推銷披圖梁（梁柏濤）本書——《令你震驚的健康真相Ⅰ》，此書已出到第十三版，重要大賣廣告促銷，係出版界少見嘅；在《蘋果》與《經濟》刊登兩個全版廣告，要幾多錢？每本書售價六十元，以六五折實收計，每賣一本，出版公司收回三十九元，要賣好多本書先至夠找廣告費條數噃。
此廣告出奇之處，係用埋「左丁山與活力先生」篇稿，真係虧披圖想得出。當日三月二十九日星期三，係跑夜馬之日，第五場有隻十二號「天行者」，係全晚最熱嘅熱門，只得兩倍，之所以咁熱，係因為之前兩次跑泥地，贏到離行離列，馬迷認為「天行者」係泥地王，況且馬主趙式明係何琍琍嘅千金，趙家素來視錢財如流水，要面要威唔恨錢，對上一次何琍琍入馬場，到沙圈引起轟動，好多馬迷話乜何琍琍靚成咁㗎，與今天嘅明星相比，年近六十嘅何琍琍更有魅力。何琍琍啱啱拉完頭馬冇耐啫，上星期三晚「天行者」再跑泥地，成為大熱門，誰曰不宜？
點知隻馬跑第尾輸十四個馬位，輸到捧場客眼坦坦，包括左丁山在內。事後練馬師告東尼好勞氣，因為馬會拉「天行者」去檢驗，發覺匹馬嘅氣管有痰，告東尼對《南華早報》記者講：「香港空氣唔乾淨，人有事，馬亦有事，隻馬有痰就會影響呼吸，呼吸唔到就一定跑得好曳。問題係出賽之前，我拉啲馬去照喉嚨，完全冇事；一出賽就有事，而且要隻馬跑得好曳先至事後再照，搵出問題所在。咁唔掂嘅噃，馬會獸醫一定要諗辦法預防隻馬臨場有痰至得！」相信獸醫都諗唔到好辦法，以後投注大熱門之前，多一個風險，就係因空氣污染而導致馬匹有痰、呼吸不暢順，沙田馬場要安置番一個「空氣污染監察儀」至得。披圖梁成日講空氣污染會影響人，原來跑馬亦受空氣污染所影響，睇嚟馬會要開始研究呢個課題。