員工超過12800人嘅本地第二大銀行集團中銀香港（2388），去年度純利創出新高，派花紅自然特別爽手。據華華所知，絕大部份員工喺上周五，都會發現紅簿仔多咗平均約一個至個半月薪酬嘅花紅，表現優秀嘅可以有三個月或以上，而「炒房」財資部攞到嘅花紅，聽聞由最少幾千銀至相等於最多七個月月薪。至於外界關注嘅加人工，就要等遲啲先揭盅。
而中銀香港評核員工表現嘅機制，今年改咗少少，簡化為「A、B、C及D」四級，獲派花紅嘅員工，須列在A、B及C級別內，A、B級又再細分為A+、A、B+、B及B-等5個分級。搞到好似會考成績咁。
消息話，名列D級嘅員工會不獲派花紅，但嗰啲員工數目少之又少，而且員工若被評為D級，都接近唔炒就要被改造嘅邊緣，所以，可以話近乎所有員工都有花紅分。