上星期祖國移動搞掂晒買人仔Peoples手續，一對親家響君悅開完記招後，隨即行上一層開房食番餐，皮幾嘢一圍食吓翅切吓鮑魚，最特別嘅係賓客陣容！主人家宙仔王建宙先搵到電訊管理局局長MH區文浩做主禮嘉賓，為佢個新logo揭幕兼噏幾嘴，MH話人仔當年開台只係用咗四個幾月，𠵱家9歲愈嚟愈進步……最進步就係搵到住好人家埋街食井水，一個鯉魚翻身由弱台變成強者！
咁其他貴賓，淨係講主家席廿幾條友都夠，幾個流動電話網絡商話事人到齊，即係數碼通得哥、CSL伍爺、傳動網衞博士、老和Albert哥同埋就快唔係SUNDAY人嘅B仔！就連固網、電視班大佬都有到──K寶海哥、8號仔AA、陀地寬頻魔鬼基等，呢班大佬罕有地超準時，開飯前半粒鐘7點正到齊，你話宙仔幾夠號召力呢！上周人仔副主席雄爺梁啓雄先講話以後有財雄勢大嘅阿媽睇住，唔使再慳住使……佢阿媽豈止財雄勢大，直頭係有頭有面。
其實點解要講呢個英雄宴？話說以前幾個流動電話網絡頭頭friend過打band，個幾月就行埋摸下酒杯底交換心得，後尾唔知點解，某個台換咗老細後就唔再聚，大家之間仲冇乜偈傾，有人話好可惜……大家唔好問華華究竟發生咗咩事，總之，電話費愈嚟愈平、零機價愈嚟愈多就係啦！