可能好多人都冇聽過《RumbleRoses》，始終讀起嚟都有啲繞口，字正腔圓咁去講，賣Game嗰個都唔知你想噏乜。之不過「鹹濕摔角」呢個朵早就開晒巷，係人都知佢係《沙灘排球》嗰類好嘢，今次佢仲執到靚晒響XBOX360推出加強版，想一飽眼福就真係咪走雞喇。
文：陳福榮
《RumbleRosesXX》（玫瑰摔角）設有10名基本登場角色，分別設有正義「Babyface」同邪惡「Heel」兩種屬性，大致上可當成《鐵拳》嗰種同一個骨架Model但有唔同造型，招式都有些微分別嘅追加人物，例如女主角零子邪惡嗰面就叫麗琥。遊戲初期會有7個正義同3個邪惡俾你揀，只要達到相當完成度就可以Unlock未出現嘅造型出嚟，唔單止咁每個角色仲有Superstar專用服裝，打得好人氣值夠高就會出現，換言之淨係儲人儲衫都有排你玩。此外仲有追加隱藏大佬同一啲都唔性感嘅國寶大熊貓㖭，都咪話唔盞鬼。
憑屈辱搞㷫人致勝
雖然《RRXX》都可以好似一般摔角Game咁，以正統方法去打拳腳交兼且逐招撻、扣晒對手體力嚟贏。不過更特別嘅係設有一條屈辱Bar，只要平時用多啲會令女仔覺得羞恥嘅招，例如擘開佢雙髀甚至接觸某啲敏感部位之類，都會令佢難為情成塊面紅晒，仲會係咁喘氣㖭！點解會咁真係唔好問我，因為平時睇啲女子摔角邊會咁款㗎，但如果大家睇得Happy玩得過癮又有咩所謂呢？
此外，今集玩家仲可以幫條女任改身材，你可以將佢整成瘦身型女，又或者波濤胸湧嘅波霸，呢樣係《沙排》都未有嘅一大改革！
強大機能上演香艷騷
猶記得上集《RumbleRoses》打算喺PS2推出時，小記早就喺TGS體驗過佢嘅正斗之處，雖然話晒係摔角Game，但擺到明「醉翁之意不在酒」，唔少男機迷爭先恐後試玩，比隔籬超大作《MGS3》仲圍得多人！𠵱家佢全面Upgrade出XBOX360版，畫面靚咗係意料中事，再加上「18歲以上推獎」，大家都應該明佢係賣咩貨，畫公仔唔使畫出腸啦！此外仲可透過XBOXLive網上對戰，同各地高手操機，唔似得上集單機玩咁寡。
今次更引入類似《沙灘排球》嘅度假景點模式，喺裏面除繼續玩水着外，仲有好多任君欣賞嘅消閒活動，而且更任你選擇以平時戰鬥格、三點式泳衣或者畀錢買嘅學生妹打扮進行比試，輸咗就要接受類似「皇帝遊戲」嘅懲罰，直頭頂癮到爆！
PROFILE
遊戲類型：FTG
對應機種：XBOX360
遊玩人數：1至4人
開發商：KONAMI
售價：$399
(C)20052006KONAMI
測試評分
如果論畫面同班女嘅吸引力，《RRXX》真係足以攞滿分，比起《沙灘排球》佢嘅誠意同耐玩性絕對高幾班，唔單止麻甩佬就連平時打開機嘅玩家都對佢讚不絕口。之不過佢始終係PS2嘅強化版，原創要素同新增點子真係唔多，玩起嚟除咗醒神啲之外就分別不太大，不過假如無玩過前作，咁《RRXX》都算係XBOX360機主必玩正Game之一，始終《沙灘排球》有嘅嘢佢全部都有，仲做得更激更放㖭！
