上周，5個交易日，港股升升跌升跌，埋單進賬88點。成個月計數，則跌112點。以往，過咗業績宣布期，個市通常都會靜中偏淡，股價冇咁大動作。炒股唔炒市，呢句話唔知流行咗N年，繼續啱用。
中資國企，可能仍係炒家追逐對象，但要好似今年第1季咁生猛，恐怕唔易，炒佢哋嘅C輪，高溢價嗰批咪沾手。
國壽C輪4576：國壽（2628）近排強勢畢呈，上周傳有大戶以低過市價少少做配售，涉銀碼近10億，好快搞掂，而瑞信則又有增持。國壽做配售後硬淨，上周二歷史高價10.15元，將來會證明唔係歷史高價，會有更高價在後頭。
搵國壽C輪買，揀4576。隻輪8月初夠鐘，輪價1.61元，溢價1.9%，槓桿率6.1倍（有效5.4倍），引伸波幅26.5%。另1隻國壽C輪4452，數據同4576差唔多。
駿威C輪9820：駿威（203）係有波幅嘅主角汽車股，上落快。駿威C輪搵隻玩短線，吼住正股跌三四個位時上車。
駿威C輪數據靚嘅，要數9820，5月尾到期，輪價56仙，溢價1.2%，槓桿率5.4倍（有效4.5倍），引伸波幅52%。另一隻駿威C輪9267，溢價過高，咪望呢隻。
章盛