「18吋胎車令、豪華車廂、紅邊皮椅，根本不是我心目中韓國車的作風。」
在外國雜誌上看見全新SantaFe豪華四驅變得歐洲化，很開心，因為韓國車又變喇。呢部新版的SantaFe仲係至頂級的三排七座位設計，載客量等同一部豪華MPV車，配備有一台恰到好處的2.7公升V6引擎，加埋電子主動恒式四驅裝置，拐彎的安全性較一般同級轎車同MPV車有過之而無不及呢！
記者：陳偉林
攝影：譚盈傑
ImageGirl：Joe（TheGroup）
「呢一代韓國『現代』（Hyundai）的豪華四驅SUV車，外貌包裝唔再局限於舊有傳統框框，賣相變得歐洲化……」
真係想唔到現今韓國的汽車設計同科技精進咁多，筆者還記得舊有「現代」SantaFe車系，不過係一款好傳統的韓式四驅車模樣，唔係咁為香港用家所認同；但轉眼不過係數年時間，呢一代的SantaFe卻教人刮目相看，除車首中間的「現代」廠徽，全車找不到一處有原來SantaFe的味道，外貌輪廓以至首尾的車燈編排，烘托多一份歐陸風味。四輪加大碼的18吋合金胎軨及屬標準裝備的原廠霧燈，仲有車頂行李架配搭，往往係不少歐、日車廠的附加Options組合，相比下出現在SantaFe身上，卻來得格外突出。
「現今豪華四驅不斷革新下，七座位SUV車款可謂買少見少，SantaFe一定有市場。」
SantaFe至頂級的七座位豪華版，三排仲係全屬原廠皮椅鑲嵌，有上佳的乘坐感，車廂裝備一應俱全，既有前排座椅的全方位電控調校外，還有前後獨立送風的恒溫冷氣，又有高級的6碟CD連MP3功能的音響系統，仲有齊電子指南針、前後獨立房燈照明、電動天窗同雨點感應水撥等裝置。筆者最欣賞係呢部豪華四驅SUV車在行駛中的車廂寧靜度，無論身處石屎森林中的都市，又或者滿布沙石地的野外，均有出眾的體驗。
「好明顯，『現代』近年專攻內櫳，中控台追上凌志，隔音有寶馬5系水準，只係按鍵夾口位未有最好嘅Finishing。」
至於話最緊要的動力配搭，新車採用上一台2.7公升V6引擎，輸出都可謂不過不失，雖然稍欠一份屬剛性的爆炸力，惟在一套4前速+/-半自動波箱的輔助下，引擎亦得以發揮淋漓盡致；再者，新版SantaFe附有一套中央差速器的電子恒式四驅系統，日常On-road主要以後驅為主，遇有需要才自動改作恒式四驅，大大提高行車的自主性同安全度之餘，還帶出慳油的一面。然而，可能在本身車重同四驅的影響下，煞車時候的制動反應，卻稍嫌欠缺一種點到即止的敏感度。最後，值得一提係全新SantaFe的用家可享有原廠5年或10萬公里的保養，就連部份歐、日車的代理商亦未必做得到！
加速：B啱啱夠用
轉向：C唔算太好
制動：B欠敏捷
噪音：B好靜
舒適：A好掂
耗油：C車身重
傳動：B夠扭力
評分標準：根據記者試車後的感覺給予評分，最好為A，最差為E。
現代SantaFe2.7規格
引擎：2656ccV6DOHC
馬力：188ps/6000rpm
扭力：25.3kgm/4000rpm
傳動：4前速+/-半自動波
車輛提供：現代香港(34288288)
供車計算機
車價：$279,000 首期：$27,900
利率：5.5%（HirePurchase計算）
每月供款：$6,382×48期（只供參考）