利世民知道大家聽「伯南克」呢個名都聽到厭，不過鬼叫佢影響力咁大，如果唔係牛咁眼昅實佢，唔通真係睇阿白頭任同啲賓卡講C定P好咩？人家伯南克雖然喺半個地球以外，但係一日香港有聯繫滙率，佢嘅影響力始終都大過白頭任同唐少。
伯南克一介書生，最主張高透明度，佢最新嘅聲明亦好清晰。𠵱家市場雖然冇乜人再講佢嘅InflationTargeting，好似已經唔再值得講。畢竟，如果佢次次都以最高透明度去講佢嘅立場，有冇InflationTargeting又有乜所謂？
不過講開又講，其實InflationTargeting都幾唔合理。首先大家要明白，美國負責編制通脹數據嘅係勞工部統計數據組，佢哋時不時就有改吓數據收集同運算嘅方式，當然有時候亦都會為咗遷就政策目標作出少少調整。所謂通脹數據亦不是甚麼鐵板一塊的經濟資訊，如果用貨幣政策去追逐通脹目標，豈不是本末倒置。老實講，聯儲局執行貨幣政策的時候，其實都係「靠估」以及「撞彩」，只不過是大家太過睇得起央行行長，以為佢哋能人所不能。
格老政策唔講出口
利世民講過，格老在位十八年，其實亦有一套非常明確嘅貨幣政策，就是「確保美元的購買力」，不過佢老人家冇講出口。佢唔講到明，係因為如果佢講明係行「零通脹」政策，好多人會話︰「傻嘅咩你？零通脹永遠都係冇可能㗎啦！」不過格老知不可為而為之，亦盡力去維繫美元的購買力，總算係對美國人有個交代。
伯南克嘅諗法雖然明顯同格老嘅唔一樣，但係公道啲講，佢哋嘅目標應該係一致。所以如果我係伯南克，我都會諗吓點解格老唔將說話講清楚，再諗諗就更加知道點解InflationTargeting唔合理。
利世民