紡織股呢排確實係冇早兩年咁好炒，好似size較大的魏橋紡織（2698）咁，雖然獲多間證券行大力唱好，目標價統統定在14元樓上，但魏橋股價總係好似唔夠力，在12元附近徘徊，令捧場客甚為氣餒。
經紀黃話，由於魏橋上市多時，早排又批過股，貨源分得較散，所以難大幅炒上。佢較為睇好size細好多嘅天虹紡織（2678），仲話「smallisbeautiful」，街貨絕大部份由芬佬坐住，貨源歸邊易炒上好多。天虹今日公布全年業績，傳聞業績會好靚仔，可能對股價有一定刺激。
天虹主要產銷紗線及坯布，公司發展策略係低價收購國有企業，然後改善管理以及提高產能，呢個策略令集團營業額增大之餘，毛利亦錄得理想增長。
基金對天虹相當有興趣，早排先至有兩位大隻佬曝光，包括一間澳洲上市公司同惠理基金，各揸住5％天虹。
天虹近排最高見1.88元，上周五微跌0.56％，收1.78元。
慕容小初