劉嘉玲同男友梁朝偉已經拍咗好多年拖，但因為佢哋遲遲都冇公開講過結婚大計，所以早排當嘉玲四出去參觀豪宅樓盤時，就有報道寫佢倒貼六千萬買樓企圖向偉仔迫婚。
難保私隱
雖然嘉玲日前出席活動時，就話自己崇尚自由，根本唔在乎結唔結婚，佢又強調自己搵錢係比偉仔少。不過呢頭講完，噚日地產界消息證實嘉玲日前扑槌買咗淺水灣嘅南山別墅，佢買嘅係一個高層面積約二千四百五十呎嘅單位，三千一百萬成交。
呢排啲明星個個都話要搬竇，話要保私隱，嘉玲今次重買埋半山高層單位，睇嚟都係怕咗狗仔啫。不過關仁咁啱都有個富貴朋友住喺嗰頭，根據地理環境顯示，南山別墅嘅地形都未必防範到狗仔隊嘅長鏡偷拍，關仁就奉勸嘉玲新居如果係決定自住嘅話，為防私隱，裝修時認真要揀定厚啲嘅窗簾布，仲要長期拉埋。
Textby關仁
