鄭嘉穎近期飽受與音樂老師戴思聰之間的合約糾紛纏擾，他日前任樂壇新人王浩信主持的TVB8新節目《星級育樂王》嘉賓，和郭晉安齊齊打網球。
最佳減壓法
鄭嘉穎表示運動是最好的減壓方法，他說：「讀小學媽咪已經畀我參加網球暑期班，一直都有keep住打，由細個到𠵱家都鍾意運動，籃球、乒乓球都鍾意。每個人都有唔同嘅減壓方法，做運動最幫到我，心情唔好打場波出一身汗會好好多。」
郭晉安就表示一向視打網球為最喜愛的運動，陳豪和黃賢誌均是其圈中波友，他說：「有對手兼唔使開工，我可以日日打都得，冇對手打就會一個人去跑步。打波同做人一樣，有來有往最開心，大家要互相就吓，吓吓一板打死人咪冇得打囉。」
至於擔任主持的王浩信由於能操流利普通話，同一時期在TVB8多個節目中擔任主持．成為TVB8近期的新寵兒。王浩信說：「我喺香港出世，爹哋係新疆人，屋企都係講普通話。四月尾推出嘅首張大碟裏面都有兩首國語歌。本身有打開羽毛球，網球就唔識，好多謝TVB畀咁多機會我演出。」
採訪：卓美娟