黃家強早排承認同日籍女友M小姐訂婚，今年仲會完成婚事，佢前晚去咗九龍灣藝能個晚會，講到即將做新郎哥，佢都忍唔住眉飛色舞咁話：「我結婚會低調啲，唔會喺香港搞，就算係都會去外國結完先至同大家公布。」 問家強幾時做老竇，佢話：「未有計劃，順其自然，如果意外有咗就好似被迫，我哋係真心相愛。」家強講嘅時候一副冧樣，關仁單睇佢個樣，都感受到佢嘅幸福。