「婚姻：外面的人拚了命要跳進去，裏面的人又拚了命的想逃出來。」這句名言，適用於現今大部份成年人，包括以下兩位代表不同年代的事業女性。
五十八歲的汪明荃（阿姐）：「我離過婚，都係單身好。」
三十二歲的陳慧琳（Kelly）：「為了生兒育女，我會結婚。」無論結不結婚，女人可以依附的不再只是男人，也可以是工作。
阿姐或Kelly，婚姻與工作對她們而言是有衝突的。到目前為止，她們能兩者兼備的，極其量是愛情與工作。 撰文：蔡如玉
在張愛玲小說《紅玫瑰與白玫瑰》裏，男主角生命中有兩個女人，妻子是白玫瑰，代表聖潔；情婦則是紅玫瑰，代表熱烈。汪明荃與陳慧琳，代表兩個年代的職業女性，擁有白玫瑰與紅玫瑰的特質，貞潔與熱情，用在男人抑或工作上，完全自主。
「想演wild角色」
阿姐日前接受訪問時，一派自信滿滿的說：「我喺螢幕前愈嚟愈熱情，但私底下我好冷，比較鍾意做番自己，少講嘢，係個悶人。」
Kelly則掀一掀嘴角笑說：「我係粉紅色，實際上係白色，但個心想做紅色，睇嚟內斂又含蓄，其實好想熱情吓，只係想做又做唔出，最好拍戲可以演吓啲wild角色，試吓做紅色。」
然而，不管是貞潔的白玫瑰，抑或熱情火辣的紅玫瑰，傳統上女人似乎離不開結婚這條路，現代抱獨身主義的女人，無論事業成功與否，仍要承受來自親朋戚友的壓力，未婚的Kelly很清楚，她與男友劉建浩（Alex）拍拖十三年，被問「幾時結婚？」比被問「食咗飯未？」還要多，她說她不是不想結婚，只是心情十五十六，Kelly說：「結婚好重要，我應該都適合。但我仲有疑問，同一個人一齊生活，一定要忍來忍去，好煩，一條友乜都自由啲，而且我怕結婚生仔後唔做嘢個人會癲。」
習慣一人生活
Kelly自言喜愛小朋友，為了生兒育女，她一定會結婚，卻又憂心：「我驚唔知生唔生到呀，我身體唔好嘛，而且年紀愈大愈會生唔到，所以都係要趁早。我男友都恨生BB，不過佢冇催我，佢知我始終會生。」
說到婚姻，阿姐是過來人，她於一九七一年結婚，當時二十來歲覺得自己是適婚年齡，又有符合條件的男士追求，結婚好像是順理成章的事，可是最後也離婚收場，她說：「雖然結婚之後係懂性好多，當時丈夫對我實在好好，但我太鍾意工作，有八成時間都放喺工作上，所以都係單身好。
「我離咗婚成二十幾年，習慣一個人生活。日對夜對咁對住一個人，一個禮拜內實死，見得多實有摩擦，邊忍得咁多？我就實唔得，遷就人係好深嘅學問，以前女人冇謀生本領先要靠男人。」
羅家英怕結婚
單身女人，不代表缺乏愛，阿姐談到拍拖十七年的男友羅家英，刀子嘴豆腐心的脾性都表露無遺，她說：「講結婚，羅家英仲驚過我，佢獨立自由慣，要佢就人好難。其實佢私底下冇做戲咁搞笑，不過佢對事情同生活態度唔計較咁多，佢係老油條嘛，點激都唔嬲㗎，性格天生，我學唔到佢。」說罷阿姐嘴角閃過一抹甜蜜笑意。
兩個事業有成，又有男友愛錫的女人唱《自由女神》，等同在說風涼話？阿姐說：「單身女人冇人錫咪自己錫自己囉，無牽無掛。其實我思想都係傳統，女人結婚後生兒育女，但究竟要結婚定單身，女人應該先想好究竟自己要啲乜。」Kelly則謂：「首歌係幫單身女仔化解壓力。女人千祈唔好為結婚而結婚，婚姻有當然最好，冇都唔係世界末日。」
紅色、白色、結婚、單身，各有所好，現代女人要婚姻與工作都兼顧得好，猶如男人把妻子及情婦都理得服服貼貼，對他們而言都是大成就。
