到海都食晚飯，經理E好好招呼。壹仔大社長與經理E識於微時，經理E在灣仔東海做Captain之時，大社長已經同佢好熟，左丁山之認識經理E，就係當年掹衫尾，跟住大社長（當年佢重未轉行）去東海之故。
多年過後，經理E仍然咁靚，咁搏命做事，抵佢成為廚神錦愛將。呢晚見到佢，左丁山忍唔住話：「E姐，你啲皮膚睇起上來白裏透紅，不如做埋護膚產品代言人啦！」E姐有啲怕羞，聽到後塊面即刻紅多啲！
講起生意，E姐話香港租金貴，煤氣費好貴，生意唔易做，所以老闆有意向內地大舉進軍，以謀後路。向邊度進軍呢？廚神錦話去東莞市元美路搵到第一個試點，有八萬幾平方呎，裝修用咗三千萬。但點心係東莞價錢，每籠點心售價係三蚊人民幣起！咁嘅價錢賣幾多點心先至夠？廚神錦話一於睇長線，內地勝在人多，地方大，以量取勝，譬如東莞東海下面有一個可泊車四千八百架嘅停車場，在香港開店根本冇可能。溫總理話過，一單芝麻綠豆小事，在中國乘以十三億人，就成為不得了之大事，非我哋香港人所能想像。
投資石係東莞人，幾十年冇返過鄉下，聽廚神錦咁講，話第日要返東莞城睇真啲，佢嘅鄉下親戚同佢講過，發達之後一定要返鄉下。投資石歎息自己在港多年，重未發達，變成港燦㖭，所以幾十年冇返鄉下，但而今人人皆說東莞好，係時候諗吓幾時返鄉咯！以前我哋離鄉來港，鄉親父老好羨慕，視我哋為南風窗，可以接濟鄉下親戚。正是十年河東，十年河西，東莞城有一個大商場大到內設四千八百架車嘅停車場，連商場外之路面停車位，一共多到八千幾個，可見當地人之豪氣，可能投資石若然返去睇真啲，返到嚟唔知會唔會買入汽車股呢？
邊食飯邊聽經理E講一位男士在網上呃女人到海都食霸王飯嘅故事，聽到出神，女士上網識男朋友，因住一身潺！