周汶錡由模特兒轉型做才女，講飲講食做埋節目主持，原來係食得多，日子有功！佢噚日同余健志出席一個無綫嘅飲食節目，喺台上就示範整幾味冷盤，不過就邊整邊偷食油炸鬼。記者見佢咁叻整嘢食，問佢會唔會整番幾味用嚟箍住老公，周汶錡話：「一齊出去食咪得囉！出面有咁多選擇。」身形咁fit嘅周汶錡原來係大胃王，佢話喺台灣試過一日食足六餐，不過就食極都唔肥。