中國內地家庭遲早要換電視機，由傳統電視機更換為高清電視機（HighDefinitionTV，簡稱HDTV），電視機製造商與零售商都有得做，而且係大做。
今周出擊，揀創維數碼（751）。
奧運催化換機潮
創維今年1月復牌急跌，出現一個達1.67元裂口，純因前主席黃宏生被廉署拘捕，但此事件已告一段落。股價至今橫行牛皮2個多月，過度反映過去，卻完全未反映其未來盈利爆炸性增長潛力。
擺在眼前，內地電視機市場即將變天，一旦落實數碼廣播制式，逾億家庭換機大行動即揭開序幕，創維肯定受惠，加上08年北京奧運，對吸引換機更有催化作用，前景靚爆鏡。
內地最遲要在年底前決定數碼廣播制式，遲遲未決主要係唔想跟隨美國、日本與歐盟國家現用嘅NTBC或SECAM制式，自行研發，可免每年繳付龐大專利費用。經多年心血，估計會在清華大學或上海交通大學2個試驗制式中，揀選其一。
目前內地與本港仍採用模擬（Analog）制式廣播，本港已決定2012年前終止，只以數碼廣播，透過新一代壓縮技術，由1條頻道變為4至8條頻道。屆時，本港200萬家庭用戶惟有全部改用HDTV，才可收睇。享受最佳收視效果，無雪花、無鬼影嘅尖端科技，人人鍾意。
內地人口13億，家庭數以億計，加埋食肆酒吧遍布各大城市，對HDTV需求，簡直係天文數字，創維處於有利地位，原因有二：
一、上周歐盟宣布徵內地彩電44.6%反傾銷稅，但創維發言人即時回應，徵稅只針對傳統彩電，與創維出口至歐洲嘅LCD電視機無關。此舉可引證創維目前生產技術與設施，早已走在時代尖端，為生產HDTV做好準備，並已開始產銷兼容HDTV設備嘅HDTVReady，日後只要加個解碼器，即可收看數碼廣播。
二、創維已與4大內地彩電生產商合組深圳聚龍，各佔20%，投資設立第5代與第6代液晶面板生產線，為迎接HDTV年代做好進一步準備，穩居龍頭地位。
新力PE78倍
盡早持有創維，必可分享內地炒高清concept嘅頭啖湯！
創維遲早成為基金愛股，與日本兩大影視音響股松下電器及新力比較，更加抵買。松下預測PE50倍、P/B1.62倍，新力PE78.3倍、P/B1.9倍。創維PE11.5倍與P/B0.97倍，高低立判。
創維短炒，填補1月復牌下跌裂口三分一，見1.56元。中線目標，填補二分一裂口，見1.83元。現價１.27元上車，可賺23-24%。
附表係FollowMe今年首季成績表，算見得人。
高彰坡