女人評女人，向來是比男人評女人嚴格許多，既然阿姐選了Kelly做合唱對象，Kelly又感榮幸，兩位女士互評當然是只讚不彈，意想不到的是，二人都覺得對方是適婚之人。
Kelly評阿姐：女性典範
最like角色：《千王之王》，好有型。
最like歌曲：《勇敢的中國人》。
對阿姐看法：「我未識阿姐時覺得佢好專業同認真，受人尊敬，係理想中嘅女性典範。知道要同佢合作，好怕配合唔到佢嘅高要求，點知原來佢好多嘢都冇乜所謂，亦唔難相處，隨和又nice啦。」
看阿姐與男友：「家英哥畀人印象好搞笑，可以娛樂吓阿姐，幫佢減壓，一個認真，一個輕鬆，有互補作用，佢哋簡直襯到絕。嗰日我同阿姐拍MV，家英哥都嚟探班，睇得出佢好緊張阿姐，好sweet。」
寄語阿姐：「我覺得阿姐會係個適合結婚嘅人，因為佢係一個好人，份人好有正義感，最適合教小朋友。」
阿姐評Kelly：處事圓滑
最like角色：未睇過佢做戲
最like歌曲：《戀愛神經》，嗰日見佢唱時跳勁舞好好睇，好有動感。
對Kelly看法：「未識Kelly時覺得佢好努力，又好少同圈中人有不和新聞，證明佢處事好好。我計埋今日見佢第五次，覺得佢好直唔造作，但又唔得罪人，當然比我圓滑啦。佢屋企環境唔錯，但唔會因此而懶，有自己嘅目標同事業，係個正當正常嘅人。」
看Kelly與男友：「我未見過佢男友，睇報紙印象中係好似頭髮少啲，但佢兩個好襯，靚仔靚女又高，睇嚟好有教養，佢男友畀空間佢做咁多嘢，感覺上似係一對完美情侶。」
寄語Kelly：「佢都係時候結婚啦，唔影響佢事業嘅，女人應該有唔同階段，佢個樣都適合家庭生活，應該鍾意小朋友。」