煲呔喺上個禮拜委任咗三個民建聯入城規會，民主黨一個都冇，自由黨執到一件，公民黨更加唔使講。
湯家驊批評，特首上個月先拉埋成棚官去撐曾鈺成，城規會又明益民建聯，其他政黨就益得咁少，擺明係同民建聯交換利益。
立法會噚日傾特首選舉條例，但湯大狀都忍唔住媽叉煲呔明益民建聯。湯大狀話，煲呔成日都要益民建聯，都係因為特首唔准有政黨背景、又冇政黨撐，搞到成日都要益政黨，特首同政黨合作就建基喺呢種利益輸送，原則同理念就拋諸腦後，咁樣對做好管治係冇幫助嘅。
田少就冇鬧煲呔，但都覺得係益咗民建聯。田少話，城規會其實要好專業獨立，好似佢以前咁，唔喺立法會嘅時候先至可以坐入城規會，佢入立法會就冇得坐，民建聯有三個人喺城規會，一定比其他政黨着數啲啦！
林D9梗係死撐話，政府係用人唯才，房委會夠有民主派啦，外界唔應該猜測政府背後目的！
爆料熱線：29290000、27860099
報料傳真：26239278
報料電郵：[email protected]