孖仔組合Soler已非年輕，但他們去年加入樂壇，憑着一張混血型男的臉孔和音樂才華，仍迷倒不少女歌迷，就連樂壇大姐大之一的楊千嬅都情傾細孖Dino，大孖Julio最近又被揭失婚漢的秘密，到底兩兄弟的感情世界是怎樣的？
撰文：比華利
孖仔組合Soler兩兄弟的感情世界，一直充滿神秘，隨着二人竄紅，外間亦甚為關心他們感情生活。大孖Julio最近被雜誌揭發為了發展音樂事業而與太太離婚兼棄女，被塑造成負心漢，又指平時無所不談的Julio，對於自己的婚姻狀況，三緘其口。Julio日前接受訪問時回應：「其實雜誌之前寫嘅嘢有真有假，不過佢哋都冇同我求證就自己寫晒出嚟。」
不排除復合
提起前妻，Julio說：「我前妻係當年朋友介紹認識，我哋結咗婚幾年，就喺我加入娛樂圈前，我哋喺好平靜嘅情況下，雙方協議分開，不過我哋離婚後仲保持友好關係，成日有電話聯絡。」Julio強調並沒有女兒，他解釋：「可能我細佬啱啱生咗個女，所以咪引起誤會。」
Julio亦明白藝人私隱有限，所以他早已料到會遭人揭發離婚，他又說：「所以我出嚟面對呢件事之前，特別打過電話畀前妻同佢屋企人，知會佢我會同記者講，希望減低對佢哋嘅傷害。」
既然與前妻再見亦是朋友，言語間Julio很維護她，那二人將來可有復合機會？他說：「緣份嘅嘢冇人知。」曾有過一段不愉快婚姻的Julio將來還會考慮再婚嗎？他說：「上一段婚姻令我對婚姻加深咗了解，都係正面訊息。不過，我𠵱家唔諗結婚住。」
唔想做和尚
有報道指楊千嬅透過側田介紹認識細孖Dino後，即情傾對方才貌，除了主動出擊外，還減肥增加自己的魅力，Dino事後見到千嬅可感尷尬，他說：「傳緋聞後，我哋一見面，我就叫佢女朋友，佢就叫番我男朋友，當然大家都知係玩。」
問到Dino對千嬅的感覺？他衝口而出說：「佢好玩得，希望大家做到朋友。」Dino為怕大家誤解，補充說：「唔係好朋友，係普通嗰種，不過佢開朗性格都好符合我嘅擇偶條件。」Dino不介意與圈中女藝人傳緋聞，但就非常抗拒涉及圈外異性，他日前因被指蒲吧𠝹女，兼帶女伴回家一夜情，重提此事，Dino即顯得悶悶不樂，他說：「嗰個女仔唔係呢行，因為同我玩俾記者寫到咁，好影響佢嘅生活，同埋畀佢好大傷害，要佢陪我承受呢啲壓力，我好內疚。」Dino更主動把該妙齡女子與千嬅相比，他說：「起碼千嬅係圈中人，佢識應付之餘，又可以行出嚟澄清，但我嗰個朋友就冇機會澄清，好似判咗佢罪咁。我就嚟冇晒朋友，坦白講我都係一個正常人，唔通想我去做和尚咩。」
「我係香港人」
Soler是意大利和緬甸混血兒，自幼在葡萄牙殖民地澳門長大，兩兄弟熱愛音樂，曾到意大利和英國的酒吧開騷，精通七種語言。在不同地方生活時都有可能遇上種族歧視問題，究竟他們認為自己屬甚麼國籍？Julio說：「我哋係混合人，好似水咁，將水倒入個杯，佢就變成個杯，水嘅威力亦好大，足以發生好恐怖嘅海嘯，總之今日Soler喺香港發展，我哋就係香港人，我哋會盡量將自己融入當地文化，打成一片。但當回到家鄉意大利，我哋就當番自己係意大利人。」
攝影：仇志德
髮型：Dannis@Headquarters
場地：CClub
